一虎 (已結業)

拉麵真係要識得刁鑽，呢間係灣仔同中環都有分店嘅一虎拉麵，除咗湯底講究，拉麵好食，仲有好多特色小食，全部都唔錯， CP值高！雖然佢入面唔會太多位，但一啲都唔迫，坐落都幾舒服！工作咁辛苦當然同三五知己飲返一支啤酒，為生活打打氣！佢呢度最出名係白虎拉麵，係用豬骨湯底熬製，味道濃郁，如果鍾意食濃味嘅，一定要食呢個拉麵！你選擇麵嘅時候佢會俾你揀埋要曲身嘅拉麵定係直身嘅拉麵，我想每啖拉麵都有勁多湯汁，所以選擇曲身！見到有黑蒜油拉麵，點可以唔試吓呢，但黑蒜油好多都會好油膩，好快就會膩， 但係呢個承諾清爽，雖然我都係食唔晒，但係唔會有膩住嘅感覺！呢度嘅餃子係佢哋師傅整嘅，唔係出面買返嚟，食落真係好juicy！而佢的雞扒更加係一流，好食過好多韓國餐廳，唔會將啲雞炸死晒，反而有大量雞肉汁，一食就知道真功夫！同呢度經理傾計，先至知道佢哋嘅湯底係每日由中央工場製作，再由GoGoVan送到各分店，所以保證每日都係新鮮湯底，難怪灣仔分店經常大排長龍！