金豪酒家

營業中

休息中

喺深水埗嘉頓山睇完日落，到附近食晚飯。行過青山道見到門口貼滿小菜既相幾吸引，就決定喺呢間解決晚餐。我地入座時間尚早，六點零唔多人，但未到八點已經差唔多坐滿。環境光猛乾淨，枱與枱之間距離足夠，唔會逼亦唔會太嘈。我地4個人叫左5個餸米網蝦春卷外皮夠薄夠脆，唔油。細細條作為前菜係一個唔錯既選擇。椒鹽鮮魷粉漿做得幾好，薄薄包住塊鮮魷。火候控制得好好，表面炸得乾身而鮮魷啱啱熟，調味唔重手，食多幾塊都唔會膩。啫啫雞雜煲上菜時係會上一碟雞雜及一個預先燒到好熱好熱既砂煲，然後喺你面前先將雞雜放落個煲到。完全做到啫啫既精粹，有齊視覺嗅覺聽覺既刺激。雞雜應該係新鮮貨而唔係雪藏野，冇腥味冇雪味。腸同腎都好爽，好入味之餘亦唔會太鹹要飲水。砂煲芥蘭啫爽肉芥蘭爽脆，豬頸肉好味，蝦醬味好香，水準以上。黑椒牛仔骨都係砂煲上，黑椒汁濃稠剛好掛喺牛仔骨度，味道唔錯配飯一流，但部分有筋位太硬。總結﹕小菜有大排檔既鑊氣，衞生環境係酒樓既質素，服務態度好，份量足又唔貴，性價比高，啱晒一班人邊食邊飲邊吹水。