永利餐廳 (已結業)

阿爸阿媽啲牙唔好，所以屋企成日都有魚食，同埋工人姐姐蒸下肉餅、水蛋咁，啱晒兩老食，今晚帶佢地出街食飯，當然都要遷就返佢地啲口味啦，佢地仲話平時工人姐姐整餸無乜未，搞到佢兩個成日口啖啖，所以強烈要求我要點啲惹味菜式比佢地嘆喎，收到！首先整番個薑蔥魚頭煲($128)，頭大而肥，魚頭煎得好香脆，肉質雪白細嫩，啖喺熱辣辣嘅砂鍋入面，凍凍地嘅天氣享用就最好不過。成個煲都夠香多汁，加埋炒香嘅蔥薑，好好送飯。再黎一個鮮茄蛋煮鱸魚($100)，鮮茄煮蛋由細食到大，味道酸酸甜甜，夾埋魚都係第一次試，鱸魚營養豐富，口感清爽，魚肉單純鮮甜，骨唔多，非常老少咸宜嘅一道菜式。再叫埋呢個鹹蛋肉碎蒸水蛋($62)，夠晒有味喇卦，軟軟滑滑嘅水蛋香滑細膩，鬆但唔散，拌入飯裡面十分容易入口，兩老都比平日食多左好多飯。 最後我私心點左個自己好想食嘅黑胡椒原隻蝦碌($138)，香脆但唔會太油膩，好開胃，蝦又甜又辣，蝦肉鮮味，彈牙結實，好味到連手指都吮埋呀！