酒樓位於女人街閣樓, 如果唔係見到地下個易拉架都未必搵到, 佢樓下係同一集團點心專門店.
平日夜晚人客唔係好多. 坐低後就寫紙叫嘢食. 海鮮有十幾種選擇都算幾多, 其他任食配料相對選擇就少啲.
先飲燉湯, 湯入面幾多湯料, 湯色好清但味道好清甜, 唔肯定有冇師傅喺入面, 不過飲完成晚冇口乾希望冇.
蒸海鮮先放粥底, 鮮淮山瑤柱都幾足料.
番薯蜆第一次食好大隻四兩都係得兩隻, 味道鮮甜多汁. 花蛤皇相比之下就細隻好多但一樣鮮甜. 清蒸海花螺細細粒清甜有嚼頭.
大連鮑魚比南非鮑魚細隻但肉質一樣彈牙淋滑.
日本大元貝件頭大隻, 肉質鮮甜美味, 食到一絲絲元貝肉.
蟶子皇肉質鮮甜爽口, 加上生熟蒜好冶味.
阿姐提議將蟲草花蒸雞放上糯米飯上蒸, 等糯米飯可以吸收雞油精華, 想想都覺得美味. 果然一蒸出嚟糯米飯好食過雞, 糯米飯粒粒晶瑩, 雞切得比較細件, 肉質唔多. 蟲草花蒸雞同糯米飯份量好大, 食完都差唔多飽.
肥牛冇乜特別, 一般貨色.
蒸肉丸鯪魚球鮮甜彈牙.
蒸南瓜比較削, 甜味不足. 蒸粟米就幾清甜有咬口.
鮮淮山瑤柱粥似潮州粥, 米粒比較分明, 粥底吸收蒸物精華, 想唔甜都幾難!
以一個任食套餐三百蚊以下有海鮮食物質素中上都算幾抵吓.
