花居酒屋 (已結業)

朋友最近介紹咗一間位於荃灣隱蔽位置嘅新開日式料理俾我，知我鍾意食日本嘢又冇得去旅行，就叫我去過吓口癮都好，當係返咗鄉下！餐廳嘅裝修具有日本風味，有唔少居酒屋必備嘅裝飾，好似燈籠、黃黃嘅燈光、達摩、白鶴等等。食物嘅選擇都非常豐富，見到兩個抵食嘅壽司set，由刺身、壽司、沙律、小食、燒物都應有盡有，選擇困難症嘅我都係交俾朋友發板。壽司方面，叫左中拖羅、鵝肝、油甘魚、火炙三文魚腩。赤身同拖羅嘅分別就係在於唔同嘅油脂分布，拖羅油脂比較多，食落去有種入口即溶嘅感覺。而鵝肝壽司都有呢種口感，甚至比起拖羅更加滿口油香。海膽真係好鮮甜，唔好諗過呢個價錢都食到咁好味嘅海膽。油甘魚壽司嘅魚味濃，食落就知道好新鮮。火炙三文魚腩亦係唔錯，喜歡半生熟嘅感覺~另外仲叫咗一份牛油果海鰻卷。呢個卷物睇起嚟已經好吸引，壽司飯入面包住分量十足嘅牛油果，上面鋪左厚厚嘅鰻魚，加上鰻魚醬汁，食落好夾！最後仲叫咗一份海膽松葉蟹黑松露蒜汁炒飯！黑松露嘅香味唔係人人都喜愛，但我同朋友咁岩都係黑松露迷，食到停唔到！加上仲有鮮甜嘅海膽同埋松葉蟹，每一啖都好滿足！