藍象泰國餐廳 (已結業)

貴為泰國米芝蓮一星餐廳嘅Blue Elephant，主打係泰國宮廷料理。選址係香港海港城開業，環境清淨，最適合三兩知己靜靜享用。好耐無飲過酒，Cocktail list非常吸引，忍唔住試左一杯傳統泰式雞尾酒，叫Phi Phi Lagoon($68)。一如所料，cocktail係透徹嘅藍色，入口係濃烈嘅酒味，正合我意。泰式小食拼盤食得多，呢度嘅小食拼盤($168)比較下相當精緻。炸蝦餅、串燒、黃金包等等擺設別緻，配埋特製醬汁非常惹味。馬可係非常特別嘅一種食物，鮮菠蘿上嘅係甜甜嘅花生糖，一酸一甜嘅口味十分開胃特別。上枱時已經俾菠蘿雞肉炒飯($138)嘅賣相吸引。炒飯材料十分豐富，香氣四溢，值得一試，唯獨係說好的雞肉不太覺眼。炒飯用上新鮮菠蘿，加添一份清新嘅感覺。飯粒分明，味道甘香，再加上肉鬆變得更為惹味。青咖喱牛肉($188)，比想像中細份，好彩味道取回分數。青咖喱有好濃郁嘅香料味，辣得恰到好處。牛肉鮮嫩有咬勁。再點左一份油鬆餅($38)。個人特別欣賞薄餅表面香脆，內裏軟熟，配上青咖喱，味道香口。