陳根記 (已搬遷) 新店位置

話說我都算係半個沙田友，但我真係好耐無嚟食飯啦！以前大學年代，一大班朋友仔過來幾過癮架，淨係兩條友過嚟撐檯腳都試過，哈！今晚係三個人嘅飯局，點咗4個餸同埋4支啤酒。為咗方便店員做嘢，呢度興自己寫好菜單交俾職員就得！啤酒啦喎，自己行過隔離買啦！『Wasabe 手撕雞』係呢到嘅招牌菜，點都要試下嘅！可多料架，有雞肉絲、海蜇、青瓜絲、火腿絲等等。海蜇同青瓜絲好爽口彈牙，但重點係佢嘅 Wasabe 醬汁，種果有少少攻鼻嘅感覺好過癮。『辣酒煮螺』呢味菜係真嘅，辣辣地好惹味（又唔會太辣），仲有啲肉絲鋪面。『芝士豬扒』有濃濃嘅芝士汁，撈飯啱曬！ 豬扒全部大大件，堆到成座山咁高。『金銀蛋莧菜』味道清清地，今晚啲餸都比較濃味，呢個剛好可以中和一下。