同前世情人，即係爸爸黎撐枱腳，一坐低爸爸即刻叫左枝大生，「得！夠凍」，見佢飲得咁過癮，本小姐都同佢啤啤啦。因為係爸爸埋單既關係，咁就由佢發辦啦。
話明係打冷小廚，點都要叫番個鹵水野捧下場啦，怕鹵水鵝片鞋口，所以叫左個鹵水鵝肉，中規中矩，同出面d潮洲打冷店無分別，但特別一讚係有兩款小吃，花生同豆腐係底，送酒一流。
食肉獸爸爸愛吃肉，第二樣餸點左蜜糖薯仔牛柳粒，一上枱已經聞到陣香味。你一舊我一舊，不知不覺間我地兩父女已經夾晒D牛柳粒，剩番成碟薯仔，但係冇問題，原來薯仔先係成碟餸既精萃，薯仔整得夠淋，蜜糖既甜味同黑椒既惹味充份溶入，無得彈。
最後一樣係本店招牌菜，芝麻雞。芝麻街本小姐就識姐，芝麻雞真係第一次聽，即管睇下你咩料。炸到金黃色既外皮上鋪滿芝麻，果然，唔係流，堅係脆卜卜。「囡，似唔似煎堆丫？」，似，仲係一款識得散發住雞油香既煎堆，正到唔識形容。
食飽舉手叫埋單既時候，姐姐話咪住，有椰汁糕送。嘩，係今時今日酒樓都唔再送糖水既時候，一間小菜餐館竟然會免費奉上甜品
