晚餐有套餐，或者其他散叫選擇，我哋叫左一個餐，有湯、配菜、主菜、甜品，仲有飲品㖭，都係二百幾蚊，夜晚係中環嚟講算係好抵
跟餐嘅湯都唔錯，但比較欣賞佢即炸嘅薯條，夠粗而且有薯仔味，有驚喜。跟餐嘅咖啡茶就普通啦，但可以無限添飲！
主菜揀左中東口味嘅羊腿，伴碟有非洲小米同沙律，配羊肉可以冇咁膩。
另外我哋仲散叫左份紐西蘭燒牛肉，份量非常足，夠厚而且燒得啱啱好，配充滿牛油香嘅薯蓉，食得好滿足，非常推薦。
食完鹹食先上套餐嘅甜品，順便試埋招牌嘅waffle
waffle係原味，配士多啤梨大黃醬，另外我哋揀咗朱古力雪糕
waffle 非常新鮮，外脆內軟，甜度剛好，配埋雪糕同醬汁非常好食，唔怪得係招牌
整體來講今餐好滿意，估唔到小店質素都咁好
