S2 Kitchen (已搬遷) 新店位置

中環石板街，街拍嘅熱選之地，亦係旅遊熱點。兩旁有好多細攤檔，有主攻遊客市嘅紀念品或縫紉用具，今晚就有各款萬聖節嘅節日裝飾品同千其百怪嘅衣飾。行上一級級石級，微微喘著氣之間走到交叉路口，轉入威靈頓街，終於搵到隱身於轉角落樓梯位置嘅「S2 Kitchen」。餐廳座位數量唔多，我地被安排左坐bar枱。餐廳老闆會不時購入特色日本酒。今晚老闆就介紹左一隻口味較清新少甜嘅清酒比我地。清酒十分易入口，入口有淡淡酒香。黑松露薄切油甘魚，不需沾醬油就咁食已好夠味。淡淡嘅黑松露香味令油甘魚嘅鮮味更突出。火炙吞拿魚腩蓉三文魚卷。經過火輕微燒過嘅吞拿魚腩蓉入口半溶，加埋三文魚同埋三文魚子一齊食，味道同口感非常豐富。蘆筍同心卷，爽口嘅露筍包着一層紫菜天婦羅一齊炸，配上明太子沙律醬，味道同口感都一流，高水準之作。燒茄子鴨胸，茄子口感偏硬，同鴨胸一齊燒呢個組合幾新穎。惟有點燒過龍帶輕微濃味。溫泉蛋泡菜炒飯，香辣嘅泡菜用嚟炒飯非常香口惹味，撈埋流心溫泉蛋令米飯嘅口感更香滑。流心芝士年糕，年糕即叫即炸，外脆內軟，中間有滿滿流心嘅芝士。最後食埋個芝士蛋糕，完美作結。