悠 定食屋 (已結業)

今日同朋友係柴灣運動場打完波，見隔離就有間餐廳就直接入左去。餐廳既裝修都幾別緻，頗有風格。我地叫左一個和風鰻魚炒飯，一個滑蛋豬肉丼，一個炸雞軟骨同埋一個芝士年糕。和風鰻魚炒飯整得好好食，使用左日本米，每一粒飯粒粒分明，鑊氣十足。鰻魚嘅份量亦都頗多，每一啖都可以食到鰻魚肉。炒飯入面仲有蛋同埋葱，為炒飯增加左味道上嘅層次。最後炒飯亦都炒得好均勻，鰻魚汁佈滿每一粒日本米嘅表面，每一啖都係一個享受。滑蛋豬肉丼亦都不俗，不單止份量多，味道亦都好好。滑蛋唔會整得太熟，豬肉亦都嫰肉多汁。另外個人十分喜歡飯入面加入左洋蔥，為飯嘅口感增加左層次。小食方面，芝士年糕炸得十分香脆，一咬開就發現入邊有好多芝士湧緊出嚟。炸雞軟骨同樣炸得好香脆，口感十足，建議大家一試。總括來講，餐廳嘅位置十分方便，好適合大家喺柴灣體育館做完運動之後去食。