何蘭正 (已搬遷) 新店位置

不嬲好少食fusion菜，好有驚喜。一入到餐廳有各式各樣既傢俬，但最搶眼都係粉紅色霓虹字鬼佬涼茶同月亮哈哈笑燈。而檯面就有印有正子既餐紙加港式筷子，好中意咁港式既野。可以問店員睇下有無當日精選。同朋友一齊嗌左店員推介既三文魚兩味，再加埋黑椒和牛臉頰配煎腸粉、黃金脆炸雞配泰式辣醬、異國風情椰子湯浸紐西蘭托托蜆及子薑芽同脆炸蟹肉飯蟹波配浙醋泡沫。覺得特別出色好味既係個牛臉頰腸粉同紐西蘭托托蜆。牛臉頰好嫩口，牛同配菜金菇都好入味，配搭腸粉真係好新鮮。而托托蜆大粒又新鮮，creamy夾薑味既湯真係好惹味，我同朋友都忍唔住好快飲到底。黎到鬼佬涼茶鋪，又點可以唔嗌鬼佬涼茶，所以我地就嗌左beer flight，可以一嚐四款手工啤酒。中意飲手工啤酒既朋友可以黎試下，中意飲佢個mango mosaic IPA同桂花啤。中意呢度會定期換下少少菜式同啤酒，所以遲啲又可以再黎試新野。仲有餐廳氛圍同啲餐具、器皿都係加分位。下次可以再回味今次啲菜式，又可以試新款野，值得再黎。