南小館 (已結業)

上海菜開到周街都係，香港仔呢間新開無耐，難得唔多人等位，決定試下佢！一睇menu價錢又唔貴，ard5,60蚊一個菜，上枱碟頭細細，幾好，可以試多幾味。未食正餐已睇埋甜品，都幾多花款，唔見一般上海舖既高力豆沙、窩餅個啲，反而多咗啲新式嘢，not bad金沙南瓜蘆筍邪惡嘢，一睇就想食，始終覺得鹹蛋黃同南瓜夾啲，蘆苟一般。鹼蛋黃唔夠鹹香，不過整體都可以。無錫小籠包幾好，皮薄多汁、肉都嫩，無咩特別但味道唔錯唔錯。四喜烤麩屋企人要食，我一般，所以no comment。秘製黑豚肉配滷蛋呢個正阿喂，肉香酸甜入味而且嫩、唔鞋口、肥肉瘦肉一層層平均分佈，入口唔油膩，出色！即刻叫咗個白飯送飯。紅豆水晶糖不甩以為係湯丸皮個啲質感，點知唔係，煙韌控表示失望，不過無阻呢舊嘢既味道，係好食嘅！清新得嚟唔會過甜！抵讚！椰汁紫米紅豆小丸子中規中矩啦呢個，同出面嘅分別唔大，成個combination喺正嘅不過，本身鐘意食，但就唔會話好有特色。