對比紅磡最出名嘅漢堡店，My Burger係貴好多，但究竟貴係邊？當然係店內裝修同本身遞上食物所用餐具嘅心思啦！工業風格嘅裝修加陳設，完全讓你感受到美國式生活。
今次已經係小妹第二次黎食啦！水準保持的！揀正午餐時間黎到，當然試到真功夫——最繁忙時間可唔可以保持質素。
今次叫咗蘑菇牛肉漢堡
咬落去，牛肉好入味，而且好軟，又保留肉汁，配合特調醬汁，唔搶牛肉香味又可以保留醬汁味！好味！加上蘑菇口感，天衣無縫！
另外，亦叫左牙買加雞肉漢堡。
辣的！雖然唔知牙買加嘅辣係點，但辣得幾過癮
加22蚊跟餐可以配飲品同水牛城雞翼！
食落辣辣地，不過小妹唔係好食得辣...
最後點左炸薯角。
新鮮炸起，外脆內軟，口感一流，當下差一支啤酒！
所有食物新鮮即製，會等耐少少，但都係合理等待時間。但餐具就唔夠用，搞到隔離枱嘅食客食完漢堡先有叉食雞翼！
細舖加上人手唔夠，一定招呼唔到！奉勸大家黎欣賞佢嘅食物，如果為服務就唔好揀呢度，盞難為一班姨姨叔叔招待你了！
