我愛慢煮 (孖沙街) (已結業)

餐廳環境舒適，唔會太擠迫，且收費合理，算係一間親民既西餐廳。同朋友嗌左主食安格斯頂級西冷牛扒(大），外加一份沙律同兩份小食（炸蕃薯條、芝士忌廉菠菜苗），仲點左一杯西柚青檸特飲同一杯柚子清酒。感覺牛扒係慢煮後再煎既，牛扒剪得啱啱好，而慢煮可以鎖住啲肉質，咬落去好鮮嫩，唔會太韌，仲帶有肉汁添。再加小小鹽同黑椒，味道簡直係正呀！鍾意食牛既朋友仔可以試下。沙律比想像中大份，有幾種沙律菜，配埋新鮮芒果粒同牛油果，芒果好甜，牛油果香滑，沙律菜好清新，值得一試。蕃薯條炸到外脆內軟，再配埋個黑松露沙律醬，又唔會掩蓋左蕃薯既甜味，味道岩岩好。同埋份量又夠多，真係抵食。芝士忌廉菠菜苗既芝士味道好濃郁，仲可以拉絲，配埋清新既菠菜，味道香濃，同埋唔會太濟。嘢飲方面，本身已經好鍾意飲西柚配青檸既嘢飲，而呢杯西柚青檸特飲冇令我失望，酸甜西柚配上清新青檸，酸中帶點兒清甜，夏天飲就啱啦，非常解渴。