樂園 (已搬遷) 新店位置

今日約左朋友去尖沙咀睇戲順便食埋晚飯，咁佢就推薦左呢間樂園，所以就一齊去試下。一入門口就見到好多桌遊同埋好可愛既貓貓！貓仔超乖，瞓左係個架到，咁我地就揀左最近貓仔瞓教個位既枱。之後我地同貓仔玩左好耐先開始睇餐牌，但店員都好好無催過我地。呢間野主要係食西餐，有沙律、意粉、薄餅同豬仔骨呢啲，亦都有吉列蠔、焗青口呢啲小食。本身朋友想叫豬仔骨，但因為睇到隔離枱叫左都幾大份我又唔係太肚餓就決定下次再試，今次就叫左意大利黑松露吞拿魚比薩$148同埋黑松露鮮菇意大利飯$168，再加左$38變餐，可以有餐湯同埋有杯$48既飲品，超過$48既飲品亦可以補差價叫。同埋我覺得呢間好既係無論你係叫小食定主食都可以加$38變餐，唔洗逼住一定要叫主食。我地今次揀左蜜桃紅茶，唔洗加錢就有，正！同堆依家加$58可以有心太軟或者窩夫，咁我地就要左個窩夫。之後就要逐樣講下。意大利黑松露吞拿魚比薩係幫我地預先切好左，唔洗自己切咁麻煩，好貼心。Pizza有超多芝士係面，而且烤得好香口，食完覺得好滿足。黑松露鮮菇意大利飯超高質！上碟既時候店員同我地講可以撈均左啲黑松露先，咁樣會香好多。我先食左未撈既，再試撈左既，果然係有分別。