大利清湯腩 (已結業)

天后地鐵站隔離有兩間清湯腩，一間叫華姐，一間叫大利，唔同嘅朋友都話兩間唔係爭好遠，不過大利好食少少，同埋有啲特別野，所以約我去食嘅時候都係去大利。平時食清湯腩，就梗係清湯加牛腩啦。但係大利清湯腩有個招牌菜，就係咖喱牛腩撈麵。咖喱香濃，唔會得個死啦，牛腩煮得夠淋又入味，配撈麵食啱啱好，我連個菜都點埋咖喱汁。最得意嘅嘢就係咖喱本身係橙黃色，如果任何麵條掂到個咖喱汁，佢會慢慢變色，有橙黃變做深紅。我相信係有啲化學原理，但係我唔知係乜，如果有人知道歡迎話俾我聽，我都真係好想知。仲要介紹一下嘅就係配撈麵嘅清湯，雖然我都覺得有少少味精，但係基本上都好好飲，一啖撈麵一啖湯確實暢快。