店內環境唔錯，地方闊落坐得舒服，前排唔少卡位，而後排就係梳化圓枱，多人聚餐都冇問題😆睇下隻辣椒燈幾得意😆
⭐乾鍋肥腸
猛火爆炒夠鑊氣，上枱時嗰浸蒜香超勁，聞到都流口水🤤肥腸有咬口，一口咬落去啲豬油勁甘香，加埋啲蒜同辣椒撈飯一流。
⭐湘式拌魚皮
魚皮好爽口，辣汁惹味，加埋芫荽香超正，呢個一食係停唔到口嘅。
⭐湘味酸菜魚
酸菜魚酸酸辣辣勁開胃，魚片下得多，無骨超滑溜😋個酸菜金湯好啱口味，直頭要攞嚟做湯飯。
⭐辣椒炒肉
湖南菜名物辣椒炒肉係必點嘅，幾乎枱枱都見到佢嘅蹤影😆豬肉嫩滑，辣椒勁香，白木耳爽口，好好食！
⭐膠原脆皮豬手
豬手炸到外皮勁脆，咬落係滿滿骨膠原嘅感覺，個脂肪位勁好食🤤本身已經滷得入味，再加上上面灑左辣椒薑蔥蒜等，令到味道層次提升，呢樣值得回味！
⭐大煲飯
樣樣餸都咁下飯梗係要叫多飯啦，成個飯煲上枱，入面起碼有四至五碗份量，仲要用上五常大米，軟綿綿有飯香，好正。
⭐麻花糍粑
飲飽食醉就係時候食埋甜品，叫咗麻花糍粑，炸得好脆，入面軟軟糯糯，點埋個黑糖就啱晒嘞。
⭐解暑西瓜檸檬茶 & ⭐鴨屎香檸檬茶
怕辣？唔使驚，店來提供特大杯凍飲😆真係超大杯重到拎唔起㗎😆甜到調節為香港人口味，微微甜啱曬喎。
菜品即叫即炒夠鑊氣，出餐仲超快添😋 上到枱仲係熱辣辣好有鑊氣，味道好入味超級餸飯，辣度可自由選擇，我哋全部揀曬中辣覺得啱啱好。加上地點方便，好食又唔貴，唔怪得排曬長龍等位👍唯一嘅缺點，就係只有荃灣/旺角有😆
