壹匯中菜廳 (東港城) (已結業)

提早食團年飯，今次揀咗呢間酒樓嘅金豬好運宴，首先想做個鴻運乳豬全體，乳豬烤得香脆，肥瘦均勻，對於我呢啲好怕肥膩嘅人來講有啖啖肉食。跟住上咗個上湯焗大蝦球衣面，伊面撈埋茨汁都幾好食，而且個蝦球係炸嘅，食落香脆。然後上咗個彩雲帶子蚌片，帶子細粒，而且望落賣相唔吸引，蚌片味道普通。發財好事大利個蠔豉好濃味，配埋個竹笙四喜生翅味道又幾夾，不過個瑤柱花膠伴菜蛋就有啲失望，瑤柱偏少，而且個菜好鹹。不過條清蒸海斑同豉油王脆皮雞都值得一讚，清蒸海斑有魚味，而且唔腥，質素唔錯，想再食多一次，而且個脆皮雞個皮都炸得好香脆，雞肉都好嫩滑，值得讚賞。最後個糯米飯同薑汁千層糕就不過不失，個薑汁千層糕冇乜薑汁味，但就食得出有紅棗味。雖然佢環境都唔算窄，坐得都算寬敞，但係可能因為多人，呢間餐廳連我哋食都未食完就趕住幫我地埋單，好似要講我哋走咁樣，令我哋要急急腳咁食，食都食得唔安落，我覺得呢樣有待改善。