海景咖啡廊

營業中

休息中

食過尖沙咀咁多間酒店嘅自助餐，個人認為呢一間係最掂檔嘅。今次食咗兩打呢款澳洲蠔，佢唔係美國珍寶蠔果一種入口成泡漿嘅肥仔蠔，而係食鮮甜爽彈口感，而且鹹味比較重。我個人覺得不加醬汁就咁食最正斗。煙三文魚同巴馬火腿就麻麻哋嘞。熱葷嚟講推介番烤羊架，無「騷」味，鮮嫩多汁入口無渣。有位女士一個人食咗六件！有乳豬但係我冇興趣。反而呢個燒腩仔，掂！皮脆、脂香、肉爽。刺身極之一般。反而漬物小黄瓜同蘿蔔好開胃。難得一見仲用蟹黄嘅燒賣，可惜瘦肉太少肥肉過多，口感同肉味差啲。