日本野 (已結業)

今晚同男友食日本野，晚市套餐抵食又份量十足，服務貼心，食物好味。石燒霜降牛小排套餐 $188先上鐵板，我地可以自己石燒牛小排，熟度自己控制，好玩好睇又好食。牛小排油脂都豐富，肉質嫩腍帶點咬口，肉汁豐富牛味重，配燒汁好惹味，個人更喜歡只沾點鹽提鮮，最後個片沾蒜蓉，味道微辣但好濃香。我地揀左配日本米飯、糖心蛋、湯、凍檸茶。米飯軟糯，糖心蛋夠入味，味噌湯微咸清香。厚燒鰻魚玉子 （三件）$43好香好熱辣辣，入口柔軟濕潤的玉子燒，蛋味香濃，中間有帶甜軟綿的鰻魚，兩者味道好夾，仲沾埋黑松露沙律醬，味道更豐富更香。和風柚子雞翼（五隻）$58雞翼好大隻抵食，炸得香脆，吸哂柚子醬汁，酸甜開胃，雞翼肉質嫩且炸得唔乾。蔥吞拿魚碎三文魚籽丼 $138超級抵食，有海量三文魚籽，入口脆卜卜，爆發咸鮮味，拌埋油脂豐富的吞拿魚蓉，油潤甘甜，魚味濃郁帶魚油香，加埋魚籽，咸度剛好。旁邊的「香港」甜蛋也好味。水信玄餅 $28份量偏細，但賣相吸引，透光櫻花好靚，睇唔到有黑蜜，但加左糖漿，味道清甜帶花香，漬櫻花微咸帶起甜味。總括，價錢合理幾抵食，食物份量足夠且好味，服務勤快細心，會推介晚市套餐。