最近同同事放工後去咗三日月試佢哋嘅豐一人套餐，成餐食落去真係又飽肚又滿足。
餐廳環境走得簡約清雅，燈光偏向柔和，坐得舒服，成個氛圍好適合慢慢歎住食。師傅表現都好專業，坐吧枱位可以睇住佢功架炒嘢。
每人套餐由前菜開始，三小點例如煙燻雞肉、味漬牛蒡、汁煮茄子，樣樣都做得好入味，煙燻雞肉嫩滑，牛蒡咬落爽口又惹味，茄子就好入味。沙律用柚子醋汁做配搭，酸酸甜甜好清新，食落好開胃。
海鮮有大虎蝦厚身彈牙、鮮甜夠味；青口都好鮮，食落好甜，令人回味。茶碗蒸用咗黑松露油提香，蛋滑得嚟又唔會太鹹。
今次我哋揀咗牛肉同豬肉—美國Prime肉眼同鹿兒島黑毛豬薄燒卷。
牛肉油脂分布如雪花一般，入口即化，加埋鐵板香氣，啖啖肉好Juicy；豬肉油脂分佈均勻，肉香濃郁但完全唔膩。鐵板炒飯雖然簡單，但炒得都香脆爽口，有蛋香同鑊氣。豆乳味噌湯味道適中，感覺好健康夠暖胃，飲完舒服晒。
甜品嘅綠茶紅豆大福，大福內餡唔過甜.
