名代宇奈備長炭燒鰻魚飯專門店 (iSQUARE國際廣場)

鰻魚飯可以話係小妹我每次去日本必食嘅名物，最近因為疫情關係，小妹暫時去唔到日本親嘗日本鰻魚風味，就惟有喺香港食啦。而早前從日本嚟香港開分店嘅「名代宇奈とと」，主打以高級備長炭現烤鰻魚，吸引小妹前往朝聖。

是日小妹夥朋友一齊前往，嗌咗一客鰻魚重特上（$158），以原條鰻魚上枱，實在令人震撼。鰻魚經過高級備長炭現烤，由於每條鰻魚都皮肉豐腴，經過明炭烤過後，魚油滿溢，淋上以砂糖和醋秘製而成嘅醬油，完全可以突出鰻魚魚肉同魚油間相互結合、令人滿足嘅滋味。再配上產自日本埼玉縣嘅稻米飯，食落認真唔錯。

如果想有多種食法，可以考慮鰻魚飯三食（$88），鰻魚塊雖然唔多，但可以配合附上嘅芥末、鰹魚湯配搭嚟食。小妹鍾意第一食為原味，品嘗原汁原味嘅鰻魚飯；第二食就可以加芥末，辣辣哋有啲似食緊丼飯；第三食就可以喺加咗芥末嘅鰻魚飯入面加入鰹魚湯整成泡飯，又係別有一番風味。

小妹鍾意食微甘嘅鰻魚肝，所以特別以套餐價加咗$15附有鰻魚肝同漬物，不過個人覺得個鰻魚肝湯味道唔突出，感覺都係食番烤鰻魚肝更滋味！