極尚大瀛喜日本料理 (已結業)

呢日朋友話要食放題減下壓，之前試過觀塘分店讚不絕口，今次去銅鑼灣分店食下先。 餐廳環境闊落，以半自助形式點餐，自助食物區入面有飲品、甜品、湯、熟食等等，食物種類好多。其他食物則由手機落單，有刺身、壽司、手卷、鍋物等等，種類繁多。 壽司同卷物都非常高質，點咗海膽手卷、花之戀、芒果龍蝦卷、牛油果卷物、醬燒蟹棒壽司，火炙三文魚壽司等等，啱晒鍾意食卷物嘅我。其他炸物及燒物精選推介包括黄金醬燒開邊蝦，芝麻雞翼，蒜蓉醬烤扇貝，燒紐西蘭香草羊鞍，極尚磯煮鮑魚，味道唔錯，絕對係番本必食推介。估唔到連壽喜燒牛肉鍋都有提供，二人份量，材料十足，有牛肉之餘仲有菇菌同蔬菜，味道都唔錯。另外仲有蟹皇鮮蟹粥，同樣係二人分量，入邊仲有蟹鉗，味道都相當鮮甜。餐廳仲有紅燒乳鴿皇，皮脆肉滑，好入味，又係必食推介。 另外榴槤控必食嘅榴連炸彈，見出面嘅自助食品區長期不斷補貨，堅受歡迎。餐廳提供大量不同飲品，有梅酒，清酒，啤酒，汽水，茶飲。我地好健康咁揀咗餐廳自製嘅無糖冷泡茶，茶味又幾香。 甜品亦有唔少選擇，包括雪糕、豆腐花、蛋糕、泡芙等等，鍾意食朱古力嘅朋友可以揀da dino雪糕，朱古力味好濃郁，頗有驚喜。