喜點.鮮鍋粥底火鍋點心專門店 (已結業)

前日同事帶我黎喜點·鮮鍋食龍蝦套餐($258/位)，海鮮款式多，牛肉質素高，份量夠，汽水仲任飲，所以今日帶老公黎試下，我老公是個大吃貨，個肚好似黑洞一樣，當然加$30升級無限配料放題啦。先上粥水鍋底，芋頭粒、南瓜粒同粟米，上次一早放晒入鍋底，糊晒，搞到黐底，今次同老公黎要扮識食，只放粟米。芋頭粒同南瓜粒留返最後同粥膽一齊煮。海鮮按人頭計份量，每人有半隻龍蝦、一隻鮑魚、一隻大貴妃蚌、一隻手掌心大的桶蠔、兩隻蝦、四片多寶魚，是日聖子皇冇來貨，所以改上大扇貝每人一隻，加一大堆海沙白同黃金蜆。蝦插左竹簽仲跳跳紮，新鮮👍🏻主食仲包括頂級肥牛，嫩滑，豐富牛味，保持一貫質素，略嫌份量少左d啫，唔夠喉，好彩加在配料任食，可以試多幾款。值得推介佢哋嘅日本黑豚肉、松花皮蛋、魚片頭、手打肉丸(梅菜豬肉丸)、滑雞、雲吞、自家製墨魚丸、薑汁皮蛋貢丸、即炸響鈴、花膠片。食得太開心唔記得影相🤦🏻‍♀️。響鈴堅係即炸，唔放湯，就咁食都好好味，如果配埋佢個酸甜醬就一流👍🏻。估唔到梅菜豬肉唔一定係蒸，用黎打邊邊都好正👍🏻紥實唔會散。只係上菜比較慢，又唔係一次過上配料，逐樣上，經常冇晒嘢食要追單，不過限時2.5小時都交左3次