大滿喜日本料理 (已結業)

早一排先食完佢嘅旺角分店，因為感覺良好，所以決定今次同另外一班朋友再戰大滿喜嘅觀塘分店。原本以為應該同旺角分店無咩分別，誰知竟然喜出望外。係觀塘mtr apm 出口，行過去一幢大廈就到。去到店長就問我地燒唔燒。心諗：唔係每間放題都有燒物㗎咩，有咩好問…… 隨口答咗：燒囉。跟著店長就帶咗我哋去一張有燒爐嘅枱。原來係自己燒自己食。店長：你點住刺身先，我轉頭上鮑魚俾你哋燒。鮑魚!？!？ 仲有蠔，青口，大蜆，八爪魚可以燒。蠔，係大大隻美國桶蠔，爽口為主，不會太creamy，非常適合磯燒。扇貝嘅殼可以用嚟燒鮑魚，八爪魚，唔使怕會痴。初時嘗試、或想做大爺的可以叫店員幫手教導。刺身選擇的部位夠肥，魚味重且新鮮。師傅會好俾心機砌靚隻船，唔會馬虎堆砌，食嘅感覺又會高多一級。是日正菜：海膽蟹膏泡飯。燒到尾聲時，可以開始滾熱上湯，之後將白飯和配料加入，想食糊些嘅就滾耐啲。啖湯有著濃郁的蟹味，份量足夠三人分。這可算係是日精品。