新麻蒲 BBQ (波斯富街) (已結業)

可能實在離開得家鄉太耐，韓籍舞伴週三晚居然話想食韓燒兼去酒吧隊啤唱好K。小肥係眾人中最早收得工嗰個，所以就負責先接靚女前往選定o既「新麻蒲BBQ」邊食邊等。餐店佔用全層面積，散座大多為卡位式，感覺開揚闊落。埋位已見桌上擺有齊備o既餐具、紙巾、清水及醬油。厚厚o既餐牌內附彩圖，並且有齊中、英、韓三語對照，舞友不用多諗即決定要食個「牛肉套餐」（$398/兩位）。寫好餸，友善o既哥哥仔隨即送上七式前菜。開爐後就倒入爐邊蛋漿。同時亦開始煲煮二人份量o既「新麻蒲部隊鍋」。部隊鍋麵條爽彈，湯底少辣醒胃又暖胃。喺等待鍋物滾起時，兩口子就一邊食住啲沙律同泡菜。多款菜品中，個人最愛惹味爽潤o既生洋蔥。清香爽薄o既蘿蔔片。及兩味香辣o既泡菜及蔥絲。食完韓味濃郁o既部隊鍋，靚女廚神即熟手地由上之下，燒煮三層拼盤。為怕進食海鮮會引起敏感而爛面，頂層細佬就只係食咗條爽脆o既腸腸。架上中間嗰格有兩款牛肉，鮮紅色o既為100g霜降牛肉，啡色o既則為120g秘製牛肋排。四件霜降牛肉雖然厚身，但食落卻又鬆軟多汁。切成幼條o既秘製牛肋排腍潤得黎肉味更濃。最底層o既薄片並非豬肉也，而係120g「新麻蒲秘製牛五花肉」。可能牛