我地平日18:30到達，當時店內都只有一兩枱食客，不過七點打後已經開始多人，7:30pm直頭見有人排隊等位，所以如果walkin建議最好可以7點前入座。
座位都好闊落，就算點左好多野食都唔怕冇位放。抽風系統做我唔錯，唔會好大油煙味。
野飲唔算太多選擇，不過汽水、果汁、果茶同涼茶都有啲。
一坐低，當然每人拎罐野飲先，雪得夠凍，因為環保問題，店內就冇供飲管。
烤肉大部份都係冇調味，不過用枱上面嗰幾款調味料都已經好足夠，我特別鍾意調味碟最右邊嘅燒肉汁，佢唔會太鹹帶仲少少甜味。
哩度最基本嘅精選熊本放題$298/位，見加$38/位就可以任食埋三款唔同嘅澳洲和牛同一款鹿兒島日本豚肉，所以我地都top up左。
每張枱都有一部平板電腦可以落單，數量都係件上，落左單之後，食物都好快送到，冇漏單或者份量出錯嘅問題。
如果有top up到澳洲和牛放題，侍應會每款澳洲和牛先黎一轉先，所以喺第一轉落單時可以點其他野食先，食過邊款啱食再encore都未遲。四款肉裡面我最鍾意封門柳，佢脂肪比較平均，肉質亦特別軟嫩。
和牛肩胛
和牛封門柳
和牛板腱
鹿兒島日本豚
其他肉重點揀左啲黎試，質素都唔差，只要留意住火喉唔好燒太耐，都唔會太韌太鞋，按個人喜蘸適量調味料已經好食。其中我特別鍾意地獄豚頸肉，佢其實只有小辣程度，辣辣地幾惹味又唔會辣得太辛苦。煙肉車厘茄卷都唔錯，番茄嘅微酸令煙肉冇咁滯，食多兩串都唔覺。
薄切牛小排
厚切牛舌
牛側腹橫肌
豚護心肉
醬燒牛三角肉
醬燒牛肩胛肉
雞腎
地獄豚頸肉
煙肉車厘茄卷
大蝦 - 大蝦唔太大隻，不過以哩個價位有蝦食都收貨。
清酒煮蜆 - 一客份量都夠兩個人食，蜆肉冇沙亦唔會太細隻。
茄子田樂燒 - 茄子已經燒好左可以即食，醬汁濃郁唔會過鹹，都幾好食。
烤肉食得多好快滯，點都要食返啲菜。值得一讚係哩度嘅蔬菜都有預先洗過仲係濕源地，所以燒嘅時候都唔洗特別幫佢補水，易燒好多。甜薯香甜，菠蘿冇渣，我都encore左。
冬菇
粟米
日本甜薯
菠蘿
胡麻豆腐沙律 - 沙律有三款揀，豆腐幾滑，胡麻醬落得足，酸酸地幾開胃。
脆皮香蕉 - 炸皮香脆唔會太厚，中間香蕉餡香甜軟糯，食落仲係暖嘅，幾好食。
章魚小丸子 - 同樣唔會太厚粉，不過如果多啲醬更好。
棉花糖 - 好驚喜見倒有棉花糖，平時棉花糖一買要買一大包，燒野食永遠食唔晒，出面餐廳食個燒棉花糖甜品都幾十蚊，哩度有得食啱晒。
就咁手拎住放近爐上面唔洗掂倒網，燒一陣棉花糖已經發脹，志在食兩串過下口癮。
甜品雖然冇雪糕，都有三款揀。特別鍾意布朗尼同泡芙，前者唔會太硬朱味都濃，後者非常鬆軟，可以食倒好多個。
朱古力布朗尼
朱古力班戟
雲呢拿泡芙
雪米糍 - 埋單時原來每人會送一粒雪米糍，雪得夠凍，不過皮就略嫌厚左少少。
總結，以烤肉放題黎講算平，雖然烤肉質素唔算好高，但都可以接受，選擇亦唔會太少，有肉有菜有海鮮有甜品有野飲，平平地想同朋友食個烤肉放題都係唔錯嘅選擇。
