和順記 (路德圍) (已結業)

晚市禁堂食之後成日都要諗晚餐食咩，難得今日先生話想食和順記，慳返我啲腦汁。第一次幫襯，嚟到門口果然堆滿人，幸運嘅係我哋落完單之後餐廳先話要暫停接單，真係遲一步都食唔到。食物方面主打港式快餐，最出名當然係神級雞髀皇，除咗抵食夾大件之外，仲有多款唔同醬汁選擇。一打開外賣袋，最驚喜嘅當然係呢隻珍寶巨髀，比先生嘅飯盒更加大，絕對係我食過最大嘅炸雞髀。雞髀外皮香脆，咬落唔會乾柴，肉質嫩滑，仲保留咗啲肉汁，質素唔錯。加錢轉嘅蕃茄湯讚岐烏冬質素亦唔錯，湯底香濃冇味精。 先生嘅巨型吉列豬扒亦係大大塊，雖然拼埋我隻巨髀到相形見絀，但同樣係即叫即炸，入口鬆脆，而且豬扒厚切，口感彈牙。餐廳嘅食物質素唔錯，特別係招牌生炸髀，新鮮即炸，性價比亦高，鍾意食炸髀嘅朋友仔絕對唔能夠錯過。