舅父仔火鍋專門店

營業中

休息中

厭倦咗火鍋放題，想搵間高質素有靚食材嘅火鍋店，朋友住開深水埗帶我嚟食呢間。睇咗菜單，選擇都幾多元化，而且價錢都唔貴，深水埗真係臥虎藏龍嘅地方。職員安排咗我哋坐卡位，梳化座感覺舒適， 如果多人的話有大圓枱， 如果想私隱度高的話仲有包房。揀咗蕃茄薯仔湯，真係冇揀錯個湯底越煲越濃，酸酸甜甜勁開胃，入面仲有牛仔粒，可以慳返叫牛肉嘅錢😆湯底入面已經有牛肉粒，所以叫咗份豬試下， 豚肉片雪花均勻，油滋味香濃，肉質鮮嫩。鵝腸爽口彈牙，灼幾秒就食得，滿滿的鵝油香。職員勁細心，午餐肉有得選擇炸或者唔炸， 炸過嘅午餐肉更香口，打邊爐必吃之選。個湯底咁正一定要叫響鈴，又名一秒響鈴， 一個好味嘅湯底，絕對要配響鈴，吸湯一流。韮菜餃同黑松露餃，各有特色，餡料非常充足，真材實料，鍾意黑松露嘅要試下黑松露餃，食完之後滿口都係黑松露香味。咁濃嘅湯底配烏冬係一絕，幾飽都要點個烏冬食下。手功丸本人都很推介，新鮮打製，口感好彈牙，餡料有鵝肝醬，亦有鹹蛋黃，感覺都幾新穎，完全感受到餐廳嘅創意。