明星海鮮酒家 (已結業)

星期六見天氣凍，一心諗住同男朋友去廟街食煲仔飯，點知經過見到明星門口個大魚缸好多人圍觀，我地都唔執輸走埋去睇埋一份，原來個師傅係度餵蟹，睇真Ｄ，係搵Ｄ鮑魚仔黎餵！！就係因為咁，我地打消左食煲仔飯既念頭，改為上去食呢隻食鮑魚既蟹。坐低先發現原來做緊promote，每一隻蟹都成五斤，問過經理可以足夠四人份量，最後我地決定兩個人淨食蟹！經理知道我地兩個人食都特登拎最輕磅既出黎，但都成五斤幾，平時睇電視就見得多，今次親眼見到隻蟹成張檯咁大，我地都嚇左一驚，食蟹過程隻手太污糟冇影到相，比大家睇下佢未比我地肢解前有幾大隻啦！肢解完佢當然要贊下佢啦！先講下蟹腳，蟹肉豐富，又夠鮮甜，未試過食蟹可以啖啖肉，其次要講下個蟹蓋，真係可以大到裝飯，每次食大閘蟹我都中意食蟹身多過蟹腳，阿拉斯加蟹剛好掉轉，我比較中意佢蟹腳既每一口的鮮肉汁，真係令人回味無窮，最後埋單都係$1670，雖然比起我地當初既煲仔飯計劃貴左十倍有多，但絕對冇後悔，唯有買少兩件衫啦，哈哈！