影片
更多
2011-12-02
807 瀏覽
FF表妹回港與家人慶祝生日，特地揀左間XO未幫襯過o既慶公宴食晚飯，比個機會小肥表哥寫食評，真係有心！慶公宴喺蘭桂坊入面一幢大廈內，好彩閒日去唔會咁逼人，不過對於我地膝頭脆弱，身材比較肥胖o既一家，行上條斜路真係有少少吃力。步入餐廳第一個感覺係非常之有古代feel，木門，枱櫈，擺設，甚至窗簾都富有中國色彩。單憑格調，大家預計食物會係經典o既中式佳餚，所以大家都頗為意外餐單咁有fusion味。 首道茗茶－明前龍井First Chinese Tea Serving – Long Jing Tea：龍井乃中國綠茶o既代表，所謂「明前」，其實係指清明節前所摘取；餐前一小杯，據說有開胃之效。依道龍井不禁令小肥想起友人M講過o既一個故仔，等我值此機會做下講故佬先：話說多年前有位將士經過一間茶亭，決定停下稍作休息，順道解解渴。坐低飲左啖龍井茶，即狠批「淡而無味」，掉頭就走。哈，點知上馬不久，將士口腔突然散發出陣陣甘香，方才驚嘆龍井原來如此「甘香撲鼻」，折返茶亭繼續用茶。故事其實係想講龍井茶要飲用後隔一陣，內藏o既茶味先會慢慢滲出。當晚慶公宴嗰杯龍井，茶香，色澤，同味道一樣淡，正好等同故事o既開頭；不
慶公宴喺蘭桂坊入面一幢大廈內，好彩閒日去唔會咁逼人，不過對於我地膝頭脆弱，身材比較肥胖o既一家，行上條斜路真係有少少吃力。
步入餐廳第一個感覺係非常之有古代feel，木門，枱櫈，擺設，甚至窗簾都富有中國色彩。單憑格調，大家預計食物會係經典o既中式佳餚，所以大家都頗為意外餐單咁有fusion味。
首道茗茶－明前龍井First Chinese Tea Serving – Long Jing Tea：龍井乃中國綠茶o既代表，所謂「明前」，其實係指清明節前所摘取；餐前一小杯，據說有開胃之效。依道龍井不禁令小肥想起友人M講過o既一個故仔，等我值此機會做下講故佬先：話說多年前有位將士經過一間茶亭，決定停下稍作休息，順道解解渴。坐低飲左啖龍井茶，即狠批「淡而無味」，掉頭就走。哈，點知上馬不久，將士口腔突然散發出陣陣甘香，方才驚嘆龍井原來如此「甘香撲鼻」，折返茶亭繼續用茶。故事其實係想講龍井茶要飲用後隔一陣，內藏o既茶味先會慢慢滲出。
當晚慶公宴嗰杯龍井，茶香，色澤，同味道一樣淡，正好等同故事o既開頭；不過隔左好耐都未有「甘香撲鼻」之感，唔知係咪代表應該泡耐少少呢？小弟對茶認識唔深，所以唔敢肯定。可以講o既係微弱o既清香味雖然未必真係能夠幫XO開胃，不過就一定可以幫客人喺進饍前暗地裡啷一啷口。
冰鎮荔枝蕃茄Chilled Tomato in Lychee’s Sauce：師傅用心o既舖排令首道菜式好有台型！每人一粒去左皮o既蕃茄仔，均勻地加上適量o既荔枝蓉同荔枝汁，一人一羮，清脆利落。夏天黎個冰鎮頭盤，效果簡直係涼透心呀！蕃茄非常爽甜，一Ｄ都唔酸，而且成功地中和左荔枝o既「火份」，食完喉嚨一Ｄ都冇痕，掂呀！
薑汁白茭荀絲沙律Water Bamboo and Ginger Salad：單睇外表重以為每人先派一碗冷麵，查閱餐單先知原來係一碗菜。白茭荀絲味道好鮮甜，口感勁爽，薑味唔重，食完重想再食，明顯地係開胃菜餚！用「沙律」兩字做中菜餸名感覺洋味好重，難道大廚係受西方教育o既？既然荀絲係煮熟左，又冇沙律醬，係咪淨叫「薑汁白茭荀絲」比較恰當呢？賣相同味道都似係中式餐前小食多過沙律囉。
香燒鰻魚伴牛油果檸檬茸Grilled Eel with Avocado and Lemon Dip：怕骨o既小肥唔敢食，只係影左幅相同大家分享。
玫瑰露酒醉海中蝦Roseate King Prawn：餐廳選擇即場火焰，好夠睇頭；提議餐廳可選用「玫瑰火焰醉中蝦」為餸名，氣勢會震撼D。師傅喺每隻蝦背界左刀，簡易地清除腸臟之餘，重可以起雙飛，令隻蝦望落去大隻Ｄ，加強視覺效果。入口有陣微微o既玫瑰露味同酒香，可能D蝦太醉啦，所以爽口同彈牙程度都爭咁DD，不過整體個蝦XO都覺得值80 分。另外，記得小肥細細個食親醉蝦都會有個伙計喺我地面前大力搖搖搖，喺個玻璃碗入面醉暈D蝦，show哂quali地証明D蝦重紮紮跳；慶公宴跳左依個步驟，所以XO唔敢肯定D蝦係咪新鮮。
酥炸芒果帶子卷Deep Fried Spring Roll with Mango Cream & Scallop：芒果同帶子味道香甜，卷物清脆，送酒佳選！從相都可以睇得出，帶子卷非常輕巧鬆化；秘訣應該在於皮層夠薄，炸得夠乾身，餡o既份量唔會過多。師傅好有諗頭，棄用芒果汁而選用芒果忌廉，不但可以減低食客咀嚼時產生「溜油」o既危機，更能加以調校味道，確保甜多於酸。
猴頭菇五指毛桃瑤柱燉湯Traditional Chinese Soup: Bearded Tooth Mushroom, Hairy Fig & Dried Scallop：一盅盅上，每盅入面都有齊哂煲湯豬肉，猴頭菇，五指毛桃，同瑤柱，新鮮滾熱辣，火候同用材都好十足！湯味香濃，重點應該係猴頭菇，腍得黎有「趙」頭，味道濃得黎又好清，好得意！豬肉雖然唔嚡唔乾，而且好腍，不過個人覺得肥膩左少少，hmmm… 煲湯好似多數用瘦肉架bor？！對煲湯料不太熟識，好自然地以為個盅入面乜都食得啦，點知有款咬極都咬唔爛，問問媽咪先知，原來貌似樹枝o既「五指毛桃」只係用黎調味，增添湯香，而並非食用，真係大鄉里啦！
二道茗茶－南岩鐡觀音Second Chinese Tea Serving –Iron Kwan-Yin Oolong Tea：睇倒餐牌上o既英文翻譯為「鐡觀音烏龍茶」，心諗究竟係鐡觀音定烏龍呀？上網求證過後先知原來鐡觀音係烏龍茶o既一種，據說有降膽固醇同燒脂之妙效，更可清除口腔雜味。唔咁肯定係之前嗰幾款餸味道較濃，亦或係茶葉唔夠o既原固，杯鐡觀音好似冇我自己沖嗰Ｄ咁香濃bor。香草陳皮烤豬肋排Grilled Pork Ribs with Pesto & Fruit Peel：非常西化o既一味，好似同餐廳個清朝主題唔係好夾，個人覺得賣相唔多吸引。豬肋排煮o既時間唔會過長，肉汁都算夠，所以就算肉質唔嫩都唔會覺得佢嚡。如果唔點另上o既鹽，單靠香草，味道唔係好夠；唔睇餐牌真係唔知個豬係用左陳皮黎醃，完全食唔出嗰個味，應該係比香草味蓋過哂。
牛肝菌黑松露炆春雞（配黑松露飯）Braised Chicken with Porcini, Truffle & Dried Scallop (Served with Truffle Rice) ：炆春雞雖然有咁多汁浸住，不過肉質都係偏乾同嚡，估計係因為煮得太耐，熟到Ｄ肉老哂。隨雞送上一人一碗o既黑松露飯，除左熱辣辣，重好香噴噴；用香滑o既雞汁送飯，濕濕地又唔會滯住滯住，簡直係頂瓜瓜！聽倒姐姐仔話黑松露飯任添，小肥就好唔客氣地食左三大碗！
三道茗茶－蜜香單欉Third Chinese Tea Serving – Dan Cong Tea：個人感覺依道係三款茶中最有味o既。XO連「蜜香單欉茶」依個名聽都未聽過，唔想話自己見識少都唔得啦！據說可幫助消化，所以被安排飯後飲。手作甜品Homemade Dessert：甜品每天不同，我地當晚所食o既係燕窩薑汁薏米桂花糕。一人一小杯，啱啱好，最重要係燕窩份量絕不吝嗇！桂花糕味道清香，不過個人覺得唔夠甜，建議可以用返傳統o既杞子，蜜桃或其他較甜o既生果黎代替味淡而嚡口o既薏米，效果應該會好Ｄ。其薑汁味唔濃，不過都足以幫助XO仔驅走滯風，Urr左啖氣。
當晚我地有房坐，有伙計負責傳菜之外，另外重有位姐姐仔為我地講解每一道餸，好細心。寫食評時，諗起有問題，以電郵方式嘗試問下啦，居然真係有回音，感激感激！
抵唔抵食就見仁見智啦！個人覺得私房菜要成$660一位其實算幾貴，不過見餐廳位於租金唔弱o既中環，當中又有海鮮，黑松露，雞，燕窩等做食材，而且睇得出師傅好用心去烹調食物，所以覺得雖不算抵，但至少可以話收費正常。張貼
