餐廳位於企業廣場，樓下有小巴站，附近亦有大商場有接駁巴士，交通方便，又易搵到餐廳，最重要人流唔算多，唔使等位。
餐廳內，大多是卡位，都有超大梳化，坐得好舒服，枱亦夠大，可以放到好多美食，唔會覺得迫夾，非常好。
主菜有14款選擇，魚、牛、豬、雞、羊、麵食……都有，每款都好吸引，而且甜品亦同樣吸引。
飲品亦有很多選擇，其中有特式飲品，個人覺得提拉米蘇咖啡好飲又特別，好似甜品同飲品同時享受一樣。
當日餐湯係蕃茄湯，溫熱順滑，質感較厚身，有濃郁蕃茄味，酸甜帶微咸，好開胃好飲。
慢煮西班牙烤雞甜椒蕃茄
有驚喜，慢煮果然唔同d，雞肉好嫩好多汁，肉質有彈性，雞肉味道突出，烤雞皮脆帶香，仲有明顯香料味，調味剛剛好。配搭甜椒蕃茄醬汁，味道更提升，甜椒好香好夾雞肉味，蕃茄又可消膩。炸蕃薯條味道香甜，肉質比薯條更扎實更飽肚健康。
法式燉羊膝
好大份好抵食，羊肉有微微羶味，突顯羊肉濃郁味道，肉質鬆軟，肉嫩多汁，醬汁有洋蔥同蒜香，仲有黑椒微辛辣感，好惹味。
意粉煮得保持彈性，唔會過軟，拌醬汁同羊膝肉食，味道更好。中間的薯蓉好綿滑，連紅蘿蔔都燉得入味。
提拉米蘇咖啡
感覺就係甜品加飲品的結合，又係驚喜。上層的提拉米蘇好細滑好creamy，可可粉加埋沾上咖啡的手指餅配提拉米蘇食，完美。下層的咖啡好香，亦可中和上層甜品的甜膩，好夾好飲。
棉花糖朱古力
賣相好靚，棉花糖燒過，特別焦香，朱古力與牛奶拌勻，兩者味道平衡，朱古力唔會過甜，影相打卡一流。
