今日去開嗰頭，慕名而來去試吓，2pm 去到唔駛等就有位不過亦坐得幾密吓，應該有唔少街坊熟客。
叫咗碗小辣腩肉雞絲紫菜米線，都煮得好快，等咗冇幾耐就有得食。
做得唔差但係坦白講唔係特別好食，因為對我嚟講個湯底係好重要，而佢個酸辣湯底並非我喜歡嘅味道；我食辣嘢都ok，但係佢個小辣都幾辣，後來聽到佢哋話個米線本身就有啲辣，小辣就係再加小辣；腩肉唔夠腩，即係唔夠肥，入口完全咬唔到出油嘅肥肉，而且比較碎，搵唔到一塊比較完整嘅；米線煮得剛好，夠滑之餘亦唔係煮到淋晒；雞絲幾特別，白雪雪咁鋪喺上面，我覺得佢應該叫佢做雞肉鬆貼切啲，用嚟嗦個湯幾好食；我唔應該叫紫菜，因為佢放埋落去煮，紫菜同米線撈埋一齊，而我自己就喜歡清楚分開等我可以一樣一樣咁食。
唔算伏，總體嚟講係好嘅，畢竟係逐碗煮嘅小店，大家去開可以一試，酸辣口味喜好大家唔一樣！
