地道館車仔麵

營業中

休息中

愛民商場入面嘅餐廳多數都係食到厭嘅連鎖餐廳，喺街市對出見到呢間門面新新哋嘅車仔麵店就入去試下。除咗車仔麵之外餐牌上仲有十幾款飯類、炒烏冬同小食，車仔麵配菜大概有三十款，食物選擇非常多。三餸一麵只係$48，有咁寬敞嘅環境坐喺冷氣之中慢慢食，喺而家嘅車仔麵店嚟講算抵。腩肉、墨魚丸、蘿蔔粗麵 ($53 連凍檸茶) ★★★★✰一個好掛湯嘅粗麵麵餅，配合鹹度適中嘅腩汁就啱啱好。腩肉對我嚟講對算肥瘦適中而且好腍；墨魚丸食到有咬口嘅墨魚肉，唔係最cheap嗰款元；蘿蔔雖然已經唔係最當造(用餐時已經係初夏)，不過都無渣同埋煮得幾腍。凍檸茶嘅檸檬同茶底都唔錯。整體而言，餐廳環境還算舒服，當日客人唔多但有好多位，店員都有laid back嘅感覺，而且呢個價錢食到呢碗麵都算ok抵。