鴻啤啤串燒 (已結業)

鴻啤啤串燒@尖沙咀愛辣人士啤啤佢呢日外出工作，天氣酷熱，同同事決定去啤啤佢，消吓暑。由於工作地點就近尖沙咀，突然發現呢間店舖，一於嚟個 happy hour ，有小食送酒就重正。入到嚟發現裝修係用心設計過，有幅大嘅香港風景畫，燈光昏暗，配合特色霓虹燈，有個寫住「及時行樂」好啱feel，仲有啲特色酒樽排列好，環境都好適合打卡。麻辣肉醬手打烏冬手打烏冬好彈牙，食落去好煙韌，配埋個麻辣肉醬食，好香好惹味，辣度適中，令人想一食再食。香辣肉碎焗娃娃菜平時唔太鍾意食菜，覺得啲菜淡而無味，但今次呢個菜我都不停食。個菜煮得剛剛好，唔會太乾，水份充足，加埋份量多嘅香辣肉碎食，肉碎醃得入味，炒得香，同菜一齊食味道剛剛好。燒虎皮尖椒呢個小食真係要推介，尖椒咬落口好爽脆，之後尖椒籽嘅辣慢慢滲出來，越食越辣，送酒一流。