梨滿園韓國料理 (已結業)

今晚行街經過，見到食物都幾豐富，而且價錢仲好實惠，任食成人只需$188加一，同埋都真係好耐一段時間無食燒肉放題了，所以意在必行😆。一坐底店員就送上泡菜、菠菜同芽菜，非常開胃。食材選擇多，有雞牛豬肉類、海鮮、湯飯、蔬菜、壽司、刺身、前菜、小炒、煎炸物等，不過飲料選擇只有汽水、雪糕。另外有韓國燒酒/啤酒就要加少少錢。首先每款牛都有叫，驚喜地全部都非常新鮮，牛類方面最推薦係牛仔骨，非常入味而且肉質嫩滑。豬肉類方面同樣地都有叫，豬肉醃過好入味，黑豚腩肉非常香口，豬頸肉非常嫩滑惹味，平時鐘意食牛多過豬既我，今晚係甘食豬，因為三款味道都唔錯，值得一試，尤其係黑豚腩肉同豬頸肉。而且豬頸肉來貨價越來越貴，係呢度都可以任食，真係好抵食🤩。其次必點既係雞腎，同樣地醃過好入味，食落爽滑滋味。炒雜菜都炒得好惹味。點了韓式大醬湯同海帶湯，前者較濃味，後者較清淡，但兩款都好飲，我地飲完再每人叫多碗海帶湯添。仲有好多韓式小食都想點但無叫到，因為我地兩個食肉獸已經食到好飽，呢個價錢同質素，食肉愛好者或韓燒迷一定唔可以錯過，真係值回票價。