百樂門宴會廳 (已結業)

以前喺觀塘返工，因為佢啲點心質素唔錯，性價比高，成班同事間唔中都會去呢度飲茶。呢晚見到apm超多人，唔想呆等位，突然諗起佢，於是過去睇吓有冇位，出乎意料，一去到就有位，見到晚飯時間，全場得9枱客，真係生意難做。個人好鍾意食生炒骨，是日叫咗碟蜜桃生炒骨，啲豬肉無膻味，唔肥，生炒骨外皮仲有少少脆，但又唔係好硬身嗰種，換咗蜜桃配搭，有新鮮感之餘，味道都幾夾，獻汁酸酸甜甜，唔會好稀水汪汪咁，唔油膩，好味! 凡惠顧正價小菜，就可以用優惠價點指定菜式，於是就揀咗清蒸沙巴龍躉，魚蒸得剛剛熟，火喉控制得好，條魚食落有鮮味，啲肉仲好滑，配埋甜甜哋有蔥香味嘅豉油，好送飯呀! 飯後送咗紅豆沙，味道普通，但唔太甜，作為呢晚嘅總結。