KiKi麵店 (希慎廣場)

營業中

休息中

知道希慎2層地庫重新裝修好，見到有好多食肆同家品鋪進駐，所以約咗朋友過嚟行下。咁啱見到KiKi 麵推出米芝蓮套餐，價錢百幾蚊就可以食到米芝蓮廚師製作嘅菜式，所以都幾有興趣。😋😋餐廳行木系風，環境都幾舒服，不過店舖位置較小，所以座位同座位間都偏迫🫢。米芝蓮限定套餐有3個主食選擇，2個偏日式（磯燒汁鮑魚麵同埋溫泉蛋肉味噌拌麵），1個就係西式啲（蕃茄乾青醬拌麵）。我最後揀咗溫泉蛋肉味噌拌麵，隨餐仲附送一碗熱湯同埋一杯飲品，都幾豐富。😆首先，份量對女仔嚟講非常足夠。味道方面，我覺得幾特別👍，菜式材料唔多，只有肉燥、生菜、同埋溫泉蛋，但三樣嘢夾埋就能夠帶出充滿日本當地風味，就好似喺日本小店會食到嘅味道咁。可能因為用咗味道濃郁嘅肉味噌作為調味料，食落鹹味恰到好處，醬汁仲帶有薑絲，層次豐富👍。有機會會再試另外兩樣！