本來想叫個原味，哥哥話明太子或者蟹膏味多人揀，我怕明太子太鹹，於是就叫咗個蟹醬流心芝士玉子燒。原來呢度係有堂食，就係放張細細嘅 bar 櫈喺路邊當枱，一路食，隔離小販大叔就一路準備開檔，真係別有一番風味😆。
講返件玉子燒，原來都唔細，亦頗厚身，塞滿咗成個透明膠盒。面頭除咗郁郁木魚絲之外，仲有沙律醬，賣相唔錯。咬一啖，即刻 feel 到入面熱辣辣嘅拉絲芝士同埋鮮甜嘅蟹膏，兩者出奇地夾，食食下仲發現原來中間隱藏咗一條蟹柳。
餡料就好豐富喇，至於玉子本身亦燒得剛好，唔會太老，夠嫰滑，甜度也適中，總括嚟講，係我鍾意嘅味道🫶。
