協和車仔美食 (已結業)

開工飯堂又黎喇！協和車仔面，係我番工食lunch成日會去既車仔麵檔！不過太多餐廳想寫，一路都未有時間寫，不過呢間車仔麵真係平靚正，行開觀塘想食碗麵，不妨試下呢間！我帶男朋友去試左次，然後佢之後都成日話要食呢間喇！睇睇個餐牌，兩餸都係$26，三餸都係$31，我通常都揀三餸或四餸，因爲佢d餸都好食，同埋勁多款呀！好似無見過車仔麵檔有咁多餸揀架！仲要全部一樣價錢，有d車仔麵鋪，肉類 、魷魚等係會收貴d架！食肉獸既我可以揀好多肉喇！！呢間車仔麵既特色，應該係係d餸上面會加上櫻花蝦，令車仔麵更香，我就好喜歡，另外唔怕辣一定要試麻辣汁，辣辣地更好味。我通常最鐘意叫豬紅、牛腩，豬紅好嫩滑好入味，牛腩唔會韌，肥瘦剛好，另外豬手都值得推薦，每份有兩大隻，爽口彈牙！今日想扮健康，所以叫多兩條菜。呢碗係男朋友既，都係豬紅、牛腩，雲吞係鮮蝦豬肉雲吞，平時收工時間就會見到呀姐係門口包，鮮蝦爽口，因為食過更好味，呢度既雲吞屬一般水準，至於墨魚丸，大可不試。平民車仔麵，地方細細，通常做學生哥同街坊生意，而家係我同同事既飯堂！希望佢保持水準 。