老百姓火鍋刺身 (已結業)

今日係星期一，又係另一個blue Monday，仲有holiday mood，返緊工已經諗緊夜晚食咩好，同女朋友傾左好耐，最後決定去打邊爐，因為會去太子附近買野，所以就打開openrice 睇吓嗰度附近有咩新開高分餐廳，最後揀咗間近深水埗既叫老百姓火鍋。去到客人唔多，所以唔洗等位就入得，裝修新淨企理，都算闊落。我哋望咗陣點菜紙，就決定叫個滋潤百姓湯，因為見佢勁多料，又花膠、又螺頭、又雞湯，重點係竟然有哈蜜瓜，第一次打邊爐，個湯底放水果🤣 原本唔想試，覺得伏伏地，點知個店員極力推薦，所以最終都決定試試佢。跟住又叫左脆炸魚皮、招牌鴛鴦滑、頂級安格斯牛頸脊、海蝦、油麥菜、皇帝菜，最後叫埋一渣竹庶茅根。首先黎左個湯，勁大煲，仲有成隻雞，雞上面有螺片花膠，雖然唔多，但感覺好足料，等個湯滾左，就迫不及待飲碗雞湯先，果然店員冇推介錯，個湯好鮮甜，雖然並唔係老火湯，但以打邊爐湯底黎講十分高質，我連續飲左兩碗，熟既哈密瓜第一次食，但又出奇地好食，唔錯，推薦。至於食物，係我哋飲緊湯既時候都陸續上枱，食物質素幾好，夠新鮮，當中最令人驚艷既係頂級安格斯牛頸脊，肥瘦適中，濃郁既牛味，口感豐富，呢個價錢，十分值。