翔壽司 (已結業)

今日放工同同事黎左哩間壽司店食廚師發辦，因為哩到既廚師發辦真係幾抵，最平嗰個餐只係$380，就會包10件壽司、一件手卷同埋麵豉湯。餐廳只有大概10個位，所以要黎既話記得預早少少。一坐低店員就問我地食唔食Wasabi，食既話壽司師傅整既時候就已經會加入適量既Wasabi同埋醬油，所以唔需要自己額外調味，一夾起就食得。🌸櫻 Sakura $380 位壽司十款👇🏻包括金目鯛、北海道牡丹蝦、赤貝、蜜柑鯛、北海道海膽、鰹魚 、生銀雪魚、沙甸魚 、生鯖魚及大吞拿魚腩。金目鯛、蜜柑鯛新鮮肥美；赤貝有驚喜，超級爽口；牡丹蝦好大隻，彈牙鮮甜；海膽份量好多，味道鮮甜；鰹魚上有蒜，微辣；生銀雪魚經過火炙，魚油味香，入口融化；沙甸魚上有薑同蔥，味道較重；生鯖魚非常厚身，上面有店家自製既醋昆布；大吞拿魚腩唔多筋，重油脂，夠肥美。另外仲有👇🏻🫔手卷：蔥吞拿魚腩手卷吞拿魚分量佔左一半，另外加上蔥同芝麻。🥣湯：麵豉湯整體黎講，哩個價錢同質素，性價比幾高，想平平地試下廚師發辦既話，哩間都係一個好選擇。