潮營火鍋小炒菜館 (已結業)

今晚去左間新開嘅餐廳，網上食評唔多，但全部都係讚，烤魚同小菜都大獲好評。其實本身想食魚多D，不過友人唔係幾好，所以試住小菜先，如果好味，下次約多D人先黎食烤魚。呢度小菜唔算貴，比平時食開果D平少少，而且仲包白飯同例湯，更加抵。首先點左餐廳推介嘅冰鎮拔絲咕嚕肉$88我之前係西九某間餐廳食過一次，果款係咕嚕肉底舖左大量冰粒，食落咕嚕肉冰凍脆口😋，本身以為呢度都係咁，點知完全係兩回事😮。咕嚕肉無冰墊底，只附上冰水，但我地都覺得浸冰水同唔浸，完全無分別，浸完唔會有加分😥；至於拔絲，呢度做到，但我唔中意，拔絲口感好似粉漿，感覺唔良好😣。唯一抵讚既係，肉既份量唔少。另一個小菜，點左友人最中意嘅椒鹽鮮魷$88上枱果陣見個色麻麻，好似未炸透，但食落脆口，魷魚鬚好有魷魚味，但魷魚身就唔OK，好薄、好硬、好乾，感覺唔似鮮魷，似係翻炸嘅魷魚🤔。整體食物質素同我想像中有出入，不過呢度主做烤魚，可能又係另一番感覺。