Seafood Stand (已結業)

想同年輕人打成一片，當然要吃吓漢堡飽。經過睇見個門面好有歐陸風情，一於就呢間啦！入內看見全是高木長枱，高bar 櫈，地盡其用，迫迫的很熱鬧。好彩剛好坐對外玻璃格仔窗的位置，與忙碌的街道人群相隔，有種寧靜享餐的感覺。客人需自己去買餐，然後侍應送食物到你處，無加一服務費。先上法國鮮蠔湯，細細碗，是用蠔肉打碎做的忌廉湯，冇腥味，不過份量略少。再嚟兩個漢堡，龍蝦司令堡和牛魔王漢堡。以我吃過多次handmade牛肉漢堡，牛魔王漢堡的牛肉較乾鞋，無肉汁無肉味，試過便算了。反而龍蝦司令堡有驚喜，份量多，有半隻波士頓龍蝦肉、一隻龍蝦鉗肉，仲有連邊的大帶子，加埋厚蕃茄片同菜，非常豐富的漢堡飽，龍蝦肉厚肉有鮮味，貴啲都抵食。跟住吃盛薈海鮮意粉、松露蒜香大蜆意粉，盛薈海鮮意粉用自家調配的甜甜酸酸蕃茄汁煮，很開胃惹味，一下子便吃光了。松露蒜香大蜆意粉，唔多覺有松露，可能比蒜香蓋過了。意粉是用木板碟托出很有台型，但卻忘記餐桌面積有限，放多碟都有些困難呢！餐具全是即棄膠刀叉，減少清潔人手之餘，但變得不太環保。