阿來東南亞風味 (已結業)

去完百利的美容店，華生帶我去附近廣華街搵食，東南亞菜絕對係我杯茶，店內係一般茶餐廳格局，勝在乾淨企理。好多嘢想食，兩個人唔食得太多，選擇困難之下......叫咗一份蒜蓉包，香脆帶軟又惹味。跟住係半隻海南雞，雞皮爽口，肉質嫩滑，雞味濃郁，好味喎。加多個油飯俾華生，試咗一啖，又香又軟。椰菜苗係必然之選，翠綠爽口，以馬拉盞炒夠惹味。想食豬髀又想飲冬蔭公，於是就叫咗呢個粉，豬髀軟滑香腍，河粉幼滑，冬蔭公夠香有點辣。整體食物唔錯，價錢又唔貴，可以再食。