上上拉麵小籠包 (已結業)

同媽咪睇完醫生，報告結果總算冇再繼續嚇我，於是就同媽咪去附近始創中心食佢最愛嘅上海菜。之前平日夜晚我都有食過，味道唔錯又有特價小食，都幾抵食!不過今日星期六下午嚟，侍應話假期冇特價冇套餐，全部散叫。其實正常價錢都好合理同埋佢份量都唔少，所以點咗兩個小食同一碟炒麵，就夠我同媽咪食飽飽。素鵝主要係腐皮包住d菇絲，其他舖有食過會放甘筍絲，筍絲……等素菜。腐皮略嫌炸過火，雖然脆但有d硬，整體都較乾爽唔太油腻。上海粗炒呢樣我同媽咪都鍾意食，佢呢種上海麵質地軟硬適中，醬油味濃郁，配料有齊白菜，椰菜同肉絲，份量十足。茶樹菇鍋貼外貌唔算好出眾，普通煎香嘅鍋貼咁，但味道好吸引，有淡淡茶樹菇嘅香味，熱辣辣咬落去，會有爆漿肉汁嘅效果。