水晶垛子黃牛肉凍食得嚟肉質實淨，蘸少少辣椒粉食更加惹味。
湯係酸辣花膠烏魚蛋湯，飲落去個酸辣度啱啱好，花膠煮得夠淋，飲完個人好暖笠笠。
魚籽醬烤鴨配山東煎餅有驚喜，鴨皮脆口夾住魚籽醬嘅鹹香，用煎餅捲住食層次好豐富。
膠東蔥燒渤海灣帶魚煮得香，蔥味入晒去帶魚度，肉質嫩滑。
傳統魯味爆三樣好有鑊氣，豬腰、豬肝同豬肚炒得爽口無異味。
個蟹對蝦醬非遺饅頭，蝦醬鮮味突出，啖啖蟹膏同蝦醬好邪惡，點嚟食真係停唔到口。
膠東鍋燒大燴菜同膠東海鮮熗鍋面，好有家常風味，燴菜材料足，個麵湯底濃郁。
甜品阿膠絲滑酸奶，加咗啲黑糖醬中和咗個酸度，同酸奶味度好夾。
整體嚟講食物有水準，服務幾周到，人均大概$500頭喺中環區算係合理。
