Moodie Wine & Dine

值得更多人認識——Moodie Wine & Dine。因為朋友生日關係，今日叫咗佢哋嘅二人套餐。套餐入邊有一個牛肉他他，因為唔食生牛肉關係，同職員講唔需要，免得浪費。職員好好，話可以轉個沙律俾我哋（好貼心）。由第一樣沙律開始，就感覺到佢哋係用心去做：橄欖油黑醋加火箭菜火腿，雖然係好簡單嘅配搭，但佢哋嘅火箭菜好新鮮，喺外面食過嘅有啲會帶苦味；火腿食落同普通嘅唔一樣（好多跟餐嘅，都唔會特別重視火腿嘅質素）。第二樣係黑松露火腿三文治，上到枱，松露味好香，外脆內軟，鹹香鹹香，好食。第三樣揀咗香辣蒜油法國藍青口，雖然肉唔係好肥，但食得出新鮮同嫩。第四樣係最有驚喜嘅龍蝦湯蕃茄長通粉配雞胸，估唔到雞胸一啲都唔乾柴，外面煎得香脆，裏面好嫩，加上龍蝦汁蕃茄帶點酸，好開胃，亦唔會好膩（值得一試）。第五樣係慢煮伊比利黑毛豬，慢煮嘅關係，保留住肉汁，爽嫩好食。最後自家製 Tiramisu 都唔錯，咖啡味好濃，底層仲有咖啡啫喱。整體用餐，冇一樣覺得係中伏或者唔值得食。而家實在太多餐廳，服務或者食物質素都下降，無論平貴都好，都未必俾到應有嘅水準。有啲貴嘅餐廳，質素仲差，根本對唔住個價錢。我哋呢個套餐，六百幾蚊二人，加埋一 service charge $757，食到佢哋嘅食材用心、同餐廳堅持員工態度，真係俾返呢個價錢嘅水準，係值得。仲有個細心位朋友生日店舖送咗一張即影即有嘅相。（絕無收費，純粹係個人感受）