南記粉麵 (金寶大廈)

營業中

休息中

南記由最初一間係香港仔，做到今時今日全港九都有分店，由最普通既魚蛋粉做到而家酸辣湯底蕃茄湯底什至火鍋配料都有，肯定有佢既魅力所在！我同幾個同事平均一個星期都會黎到公司附近呢間南記食lunch。環境：呢度多數都係2人同4人位，想自己一個人靜靜地食野又唔想同人搭枱既，呢度都有一排對住舖面既單人位，坐位安排照顧周到啦。服務：雖然係快餐店式自助取餐，但侍應呀姐好主動執枱收餐，係繁忙多人既lunch time絕對發揮到作用，同埋呢度既呀姐好有禮貌，次次黎到都小心前唔該後。衛生：正如上面講左，侍應呀姐收餐抹枱快手快腳，另外餐具跟餐一齊上，有別傳統粉麵店放係枱面任攞，感覺衛生d。味道：其實我每次黎都係點春卷魚蛋清湯米線。春卷係南記招牌，就算我平時少食煎炸熱氣野，但黎到每次都會點春卷，因為真係好好味好彈牙，魚蛋都係我另一至愛，好滑同好爽口，配清清地既米線同湯，清淡得黎好滿足。不過值得一提，呢間南記既清湯愈黎愈唔清，成碗都係油，有d嚇親！抵食：新一年南記又加左價喇，兩餸麵加左1蚊，但今時今日27蚊食到兩餸麵，價錢上其實都算抵，最緊要仲要係好味丫嘛。